Modiwl 4: Ymchwilio i’r ffactorau diwylliannol sy’n dylanwadu ar fusnesau rhyngwladol

About Lesson

Ffactorau diwylliannol

Mae ffactorau diwylliannol gwlad yn ymwneud â chredoau, normau ac agweddau sy’n perthyn i’r boblogaeth.

Iaith

Amcangyfrifir bod tua 7,000 o ieithoedd yn cael eu siarad ar draws y byd. Mae gwahanol ieithoedd yn ffactor bwysig pan fydd busnes yn allforio. Os yw pobl y wlad yr allforir iddi yn siarad iaith wahanol, yna mae’n rhaid ystyried sut i gyfathrebu ag asiantaethau a busnesau eraill yn y wlad honno a hefyd sut i gyfathrebu â gweithwyr a chwsmeriaid.

Cyfansoddiad ethnig

Diffinnir grŵp ethnig fel cymuned neu boblogaeth sy’n cynnwys pobl sy’n rhannu cefndir diwylliannol neu dras cyffredin.

Fel arfer bydd gan wledydd gymysgedd o grwpiau ethnig.

Mae Cyfrifiad y DU yn cofnodi cefndir ethnig mewn 19 categori mewn 5 prif adran:

Gwyn
Grwpiau Cymysg neu Amlethnig
Asiaidd, Asiaidd Cymreig neu Asiaidd Prydeinig
Du, Du Cymreig, Du Prydeinig, Caribïaidd neu Affricanaidd
Grŵp Ethnig Arall

Munud i feddwl

Defnyddiwch yr wybodaeth isod i ateb y cwestiynau sy’n dilyn

Cyfran y preswylwyr (rhwng 16 a 64 oed) ym mhob grŵp ethnig

Cyfrifiad y DU

Pa grŵp ethnig sydd â’r nifer fwyaf o bobl

sydd ddim mewn gwaith?
sy’n fyfyrwyr?
mewn swyddi rheoli?

Ydych chi’n gallu meddwl am resymau dros y gwahaniaethau hyn?

Strwythurau cymdeithasol

Mae strwythurau cymdeithasol yn ymwneud â statws pobl yn y gymdeithas. Er enghraifft, yn y Deyrnas Unedig mae sôn yn aml fod pobl yn perthyn i’r dosbarth gweithiol, y dosbarth canol neu’r dosbarth uwch. Mae gwahaniaethau mewn addysg, incwm a diwylliant yn gallu bodoli yn y gwahanol ddosbarthiadau. Mewn gwledydd eraill ceir strwythurau cymdeithasol tebyg i hyn hefyd, e.e. mewn gwledydd fel India, Pacistan a Nepal ceir cyfundrefn gast. Yn India mae’r system hon yn dosbarthu pobl i 4 dosbarth sef y Brahmin (offeiriaid), y Kshatriya (rheolwyr, gweinyddwyr a rhyfelwyr), y Vaishya (masnachwyr a ffermwyr) a’r Shudra (llafurwyr).

Fe all fod yn bwysig i fusnesau ddeall strwythurau cymdeithasol gwlad er mwyn penderfynu sut i dargedu eu cynhyrchion.

Crefydd

Mae tua 85% o boblogaeth y byd yn uniaethu â chrefydd. Y grefydd fwyaf yn y byd yw Cristnogaeth, wedyn Islam, Hindŵaeth a Bwdhaeth. Mae credoau sy’n mynd law yn llaw â chrefydd yn gallu cael effaith ar fusnesau, e.e. mae Mwslimiaid yn credu nad oes gan arian werth ynddo’i hun ac felly mae eu systemau bancio yn wahanol oherwydd hynny.

Munud i feddwl

Dilynwch y ddolen i safle we McDonald’s India:

McDonald's India

Mae mwyafrif poblogaeth India yn Hindwiaid.

Pa effaith mae hyn wedi ei gael ar fwydlen McDonald’s yn y wlad?

Gwerthoedd

Mewn rhai gwledydd mae llwgrwobrwyo a llygru yn rhan fawr o sut mae busnes yn digwydd. Mae llwgrwobr yn daliad er mwyn perswadio rhywun i wneud rhywbeth ac er ei fod yn arferol mewn nifer o wledydd, nid yw’n dderbyniol yn gyffredinol.

Mae Transparency International yn brwydro yn erbyn llygredd mewn busnes ac yn cyhoeddi ‘transparency index’ sy’n dangos pa wledydd sy’n cael eu cyfrif yn fwy agored i lwgrwobrwyaeth a llygredd.

Agweddau at fusnes

Mae gan wledydd ledled y byd wahanol agweddau at wneud busnes. Er enghraifft, mae prydlondeb i gyfarfodydd yn bwysig iawn yn Tsieina ond yn India mae’n fwy arferol i bobl fod yn hwyr i gyfarfodydd. Yn y ddwy wlad mae dweud ‘na’ yn cael ei ystyried yn beth anfoesgar, felly dylid osgoi defnyddio’r gair. Mae’n bwysig bod busnesau yn sicrhau eu bod yn ymchwilio ac yn deall arferion lleol.

Agweddau at waith

Mae gwahanol agweddau tuag at waith ar draws y byd hefyd. Er enghraifft, yn y graff isod gallwch weld y canran o bobl mewn gwlad sy’n dweud y dylai gwaith ddod yn gyntaf – hyd yn oed os yw’n golygu llai o amser rhydd (ymchwil gan World Values Survey, Coleg King’s, Llundain). Gallwch weld amrywiaeth eang iawn rhwng y mwyaf a’r lleiaf.

Y System Haenedig

Munud i feddwl

Gwyliwch y fideo isod.

Sut mae cyfarfodydd yn Japan yn wahanol i gyfarfodydd yn UDA?

Bod yn agored i newid

Mae rhai gwledydd yn fwy agored i newid nag eraill. Mae’r gwledydd hyn yn fwy tebygol o fod ar flaen y gad yn dechnolegol, sy’n gallu bod yn fuddiol i fusnesau.