Syniadau Busnes

Mae cynlluniau busnes yn amlinellu’r syniadau ar gyfer y busnes yn y dyfodol. Byddwch yn clywed yn aml am yr angen i greu cynllun busnes wrth greu menter newydd ond mae cynlluniau busnes yn bwysig drwy gydol oes y busnes. Mae syniadau busnes yn gallu digwydd ar unrhyw adeg ond yn aml maent yn ymateb i symbyliad allanol.

Busnes Newydd

Bydd syniadau ar gyfer busnesau newydd yn dod o sawl cyfeiriad:

Bwlch yn y farchnad

Bwlch yn y farchnad yw’r galw am gynnyrch neu wasanaeth sydd ddim yn cael ei fodloni ar hyn o bryd. Mae sylwi ar fwlch yn y farchnad yn gallu arwain at syniadau busnes llwyddiannus gan na fydd unrhyw gystadleuwyr uniongyrchol yn y tymor byr.

Cystadleuwyr

Gall syniadau busnes ddod o gyfeiriad cystadleuwyr. Does dim byd o’i le ar sefydlu busnes sy’n debyg i gystadleuydd (yn wir, mae’r rhan fwyaf o fusnesau yn seiliedig ar syniadau sy’n bodoli yn barod) ond mae angen sicrhau bod gan eich busnes rywbeth amgen i’w gynnig sy’n ei wneud yn wahanol, e.e. lleoliad gwahanol, nwydd gwahanol neu bwynt gwerthu unigryw (USP).

Tueddiadau cyfredol

Ymddygiad cymdeithas sy’n gyfrifol am dueddiadau cyfredol. Er enghraifft, yn y DU, mae gostyngiad diweddar yn y nifer o bobl sy’n dewis prynu dillad ‘ffasiwn gyflym’.

Galw tebygol

Mae galw tebygol yn debyg i dueddiadau cyfredol – mae gweld galw am nwyddau yn gallu arwain at wneud penderfyniadau. Er enghraifft, gallai newidiadau mewn deddfwriaeth gynyddu’r galw am nwyddau neu wasanaethau. Ambell waith mae digwyddiadau yn hybu’r galw am nwyddau, e.e. mewn un astudiaeth, roedd 80% o bobl yn dweud eu bod yn poeni am effaith amgylcheddol y nwyddau maent yn eu prynu. Mae hyn yn cynyddu’r galw am nwyddau cyfeillgar i’r amgylchedd sy’n creu cyfle i fusnesau newydd.

Busnes wedi’i sefydlu’n barod

Gall newidiadau tebyg orfodi busnes sydd wedi’i sefydlu i wneud penderfyniadau ynglŷn â sut i addasu:

Newidiadau yn yr hinsawdd economaidd

Mae economïau yn dueddol o fynd drwy gyfnodau gwahanol ar ffurf gylchol. Mae cyfnodau da yn cael eu dilyn gan gyfnodau llai llewyrchus ac yn y blaen. Bydd angen i fusnes benderfynu sut mae’n mynd i ymateb i newidiadau economaidd.

Mae’r fideo hwn yn rhoi mwy o wybodaeth am y cylchred economaidd (Saesneg yn unig):

Mae newidiadau yn yr hinsawdd economaidd yn creu cyfleoedd ar gyfer gwahanol fathau o fusnesau. Pan mae’r economi yn mynd yn dda mae pobl yn tueddu i wario mwy ar gynhyrchion a gwasanaethau moethus, e.e. gwyliau tramor, mynd allan i fwyta a nwyddau fel setiau teledu, ceir ac yn y blaen. Pan nad yw’r economi yn gwneud cystal mae pobl yn dueddol o gynilo eu harian, gwario mwy ar brydau parod i fwyta gartref, mynd ar wyliau yn lleol a phrynu ffilmiau i wylio gartref. Maen nhw’n cadw ceir a nwyddau eraill yn hirach ac yn trwsio neu brynu’n ail-law yn hytrach na phrynu pethau newydd.

Munud i feddwl

O’r wybodaeth uchod, meddyliwch pa fathau o fusnesau sy’n elwa mewn ffyniant economaidd a pha fathau o fusnesau sy’n elwa pan na fydd yr economi yn perfformio mor dda.

Tueddiadau

Mae tueddiadau cwsmeriaid hefyd yn effeithio ar fusnesau sydd wedi’u sefydlu a byddant yn cadw llygad ar ymddygiad cwsmeriaid er mwyn sicrhau eu bod yn ymateb i’r tueddiadau hynny. Er enghraifft, mae nifer o fusnesau wedi ymateb i’r twf diweddar yn y nifer o bobl sy’n dewis bod yn fegan a chynnig dewisiadau fegan fel rhan o’u hamrywiaeth o nwyddau, er enghraifft:

Fabulous Welsh cakes

Cystadleuaeth

Os oes busnes wedi cymryd mantais o fwlch yn y farchnad neu dechnoleg newydd, bydd ganddo gyfnod heb lawer o gystadleuaeth. Ond ymhen hir a hwyr bydd mwy o fusnesau yn ymuno yn y farchnad. Hefyd, os yw patentau yn dod i ben, bydd cwmnïau eraill yn gallu copïo’r dechnoleg newydd neu greu eu nwyddau eu hunain. Wrth i gystadleuwyr gyrraedd y farchnad, efallai bydd yn rhaid i fusnes addasu i’r amgylchedd cystadleuol newydd.

Gallai hyn ymwneud â defnyddio Matrics Ansoff er mwyn dadansoddi’r amgylchedd cystadleuol.

Defnyddio Matrics Ansoff