Pwysigrwydd a manteision rheoli ansawdd

Mae gwelliant parhaus yn broses barhaus o nodi, dadansoddi a gwneud gwelliannau i systemau, prosesau, cynhyrchion neu wasanaethau. Dyna sut mae busnesau yn ceisio sicrhau eu bod yn gwella effeithlonrwydd drwy’r amser.

Bydd systemau cynhyrchu sy’n gwella’n barhaus yn arwain at gynnyrch o ansawdd gwell. Yn ei dro fe ddylai hyn arwain at gwsmeriaid bodlon ac enw da.

Yn y gorffennol roedd y pwyslais ar wirio ansawdd, lle’r oedd nwyddau yn cael eu cynhyrchu ac yna roedd proses o wirio bod y nwyddau gorffenedig o ansawdd digonol. Heddiw, mae system rheolaeth lwyr ar ansawdd yn adeiladu ansawdd i mewn i’r holl brosesau fel y dylai fod llawer llai o angen am systemau gwirio ansawdd yn y pen draw.

Wrth gael safonau a phrosesau ansawdd mewn lle, mae llai o angen goruchwylio gweithwyr hefyd.

Mae meithrin perthynas glos â chyflenwyr fel rhan o reoli ansawdd yn arwain at foddhad cyflenwyr gan eu bod yn teimlo’n rhan o system sy’n gweithio.

Os yw nwyddau diffygiol yn cyrraedd y cwsmer fe fyddant yn anfodlon. Efallai byddant yn meddwl ddwywaith cyn prynu nwyddau’r cwmni eto.

Nod gwella ansawdd yn aml yw sicrhau effeithlonrwydd, ac yn ei dro, gwella proffidioldeb trwy leihau gwastraff a sicrhau nwyddau o ansawdd uchel sy’n bodloni cwsmeriaid.