Modiwl 4: Ffactorau sy’n dylanwadu ar reolaeth, cymhelliant a pherfformiad y gweithlu a rheoli newid

About Lesson

Hyfforddiant a datblygiad

Diben dadansoddi anghenion hyfforddi

Mae’r amgylchedd busnes yn newid yn gyflym felly mae angen i fusnesau sicrhau bod gan eu gweithluoedd y sgiliau angenrheidiol ar gyfer y gwaith y maen nhw’n ei wneud. Hefyd, gall ffyrdd o weithio newid, gall technoleg newydd gael ei gyflwyno yn y gweithle neu gall natur y gwaith newid. Bydd angen i fusnesau ddadansoddi beth yw’r anghenion sgiliau yn ogystal â darganfod i ba raddau y mae gan y bobl sy’n gweithio i’r cwmni y sgiliau y maent eu hangen. Os nad oes ganddynt y sgiliau angenrheidiol, mae modd rhoi rhaglen hyfforddiant ar waith

Dulliau hyfforddiant

Mewnol/Allanol

Hyfforddiant mewnol yw dysgu gan rywun sydd yn y gwaith yn barod, gall fod yn gwrs hyfforddi neu yn gynllun mentora (gweler isod).

Mae hyfforddiant allanol yn cael ei ddarparu gan asiantaeth y tu allan i’r busnes fel darparwr hyfforddiant.

Wrth y gwaith

Mae hyfforddiant yn gallu digwydd wrth y gwaith neu i ffwrdd o’r gwaith. Mae wrth y gwaith yn golygu bod y gweithiwr yn derbyn hyfforddiant wrth wneud ei waith arferol, e.e. mentora neu hyfforddiant.

Mentora

Mentora yw pan fydd aelod mwy profiadol o’r cwmni yn hyfforddi neu’n cefnogi rhywun llai profiadol. Mae hyn yn aml yn cael ei ddefnyddio pan fydd person yn dechrau gyda’r busnes ond gall barhau drwy gydol cyfnod gwaith.

Cynllun annog/hyfforddiant

Mae anogaeth yn ddull hyfforddiant arbenigol sy’n ymwneud â thrafod a datblygu syniadau ar gyfer gwelliant. Nid yw anogwr yn dweud wrth bobl beth i’w wneud ond yn hytrach yn trafod er mwyn rhoi cynllun gwelliant ar waith.

I ffwrdd o’r gwaith

Gall hyn gynnwys cyrsiau i ffwrdd o’r gwaith arferol. Gall fod yn fewnol neu’n allanol. Mae cyrsiau mewnol yn cael eu darparu gan y cyflogwr ond mae cyrsiau allanol yn cael eu darparu y tu allan i’r gweithle, e.e. mewn coleg neu ganolfan hyfforddi.

Prentisiaethau

Mae prentisiaethau yn gymysgedd o hyfforddiant wrth y gwaith ac i ffwrdd o’r gwaith. Mae prentisiaid yn gweithio yn y swydd ac maent yn cael eu hyfforddi wrth weithio. Bydd y prentis hefyd yn cael cefnogaeth gan goleg neu ddarparwr hyfforddiant.

Munud i feddwl

Gwyliwch y fideo isod.

Pa fath o hyfforddiant mae prentisiaid yn ei dderbyn?

Beth yw manteision prentisiaethau i’r prentis?

Effeithlonrwydd hyfforddiant

Bydd busnesau eisiau mesur effeithlonrwydd yr hyfforddiant. Os yw hyfforddiant yn ymwneud â rhywbeth penodol e.e. dysgu sut i ddefnyddio system newydd, bydd busnes yn gallu gweld effeithiolrwydd yr hyfforddiant trwy weld pa mor dda y caiff y system ei defnyddio. Ffordd arall o fesur effeithiolrwydd hyfforddiant yw drwy ofyn i weithwyr lanw holiaduron yn seiliedig ar yr hyn a ddysgwyd.