Busnesau Sector Preifat

Mae uchafu elw yn strategaeth o wneud yr elw uchaf posib felly bydd y busnes yn ceisio darganfod y lefel cynhyrchu sy’n arwain at y mwyaf o elw posib.

Mae yna gostau i ddechrau busnes ac mewn rhai diwydiannau mae’r costau hyn yn enfawr. I nifer o fusnesau, yn enwedig yn eu blynyddoedd cyntaf, adennill costau yw eu nod.

Yn y DU, yn ôl ymchwil gan Fundsquire, rhwydwaith ariannu cychwynnol byd-eang, mae 20% o fusnesau bach yn methu yn eu blwyddyn gyntaf. Mae tua 60% o fusnesau bach yn methu o fewn y tair blynedd gyntaf. Felly, i nifer o fusnesau newydd eu prif nod yw goroesi. Mae hyn yn wir hefyd pan fydd busnesau’n mynd drwy gyfnod nad oeddent wedi ei ragweld. Er enghraifft yn ystod y cyfnod clo Covid roedd rhai busnesau yn ei gweld hi’n anodd oherwydd diffyg cwsmeriaid. Yn ystod y cyfnod hwnnw, eu hunig nod fyddai goroesi.

Nod arall sy’n bwysig yn y sector preifat yw twf ac i rai busnesau dyma yw’r nod pennaf. Mae tyfu’n gyflym yn gallu bod yn risg gan fod twf yn golygu buddsoddi yn y busnes, ond mae’n gallu bod yn strategaeth lwyddiannus oherwydd y gall arwain at fwy o elw yn y pen draw. Yn ôl prosiect Wales Fast Growth 50 – gwnaeth y 50 o gwmnïau a dyfodd gyflymaf greu £654m o drosiant yn 2021 a chyflogi bron i 4,000 o bobl.

Mae nifer o fanteision i fod yn arweinydd y farchnad. Er enghraifft bydd pobl yn fwy ymwybodol o’ch cynnyrch.