Gwleidyddol

Yng Nghymru mae rhai agweddau gwleidyddol fel iechyd, twristiaeth a bellach rhai trethi wedi eu datganoli i Lywodraeth Cymru. Sefydlwyd Llywodraeth ddatganoledig Cymru ym 1999 pan etholwyd 60 Aelod Cynulliad. Gwyliwch Dafydd Iwan yn sôn am yr hanes:

• Amaethyddiaeth, coedwigaeth a physgota
• Addysg
• Yr amgylchedd
• Iechyd a gofal cymdeithasol
• Tai
• Llywodraeth leol
• Priffyrdd a thrafnidiaeth
• Rhywfaint o reolaeth dros dreth

 
Felly penderfyniadau Llywodraeth Cymru fydd yn effeithio ar fusnesau yn y meysydd hyn. Mae pethau eraill fel trethi cyffredinol, amddiffyn, polisïau tramor ac yn y blaen yn cael eu rheoli gan Lywodraeth y Deyrnas Unedig. Mae busnesau’n gallu elwa o gefnogaeth gan y Llywodraeth yn ariannol neu drwy ei phenderfyniadau polisi.

Gall busnesau hefyd elwa neu gael eu heffeithio yn negyddol o gysylltiadau gwleidyddol ar draws y byd. Er enghraifft os yw busnesau yn rhan o floc masnachu.

Gan fod masnachu’n rhyngwladol yn gymhleth a bod iddo lawer o reolau mae gwledydd yn aml yn dod at ei gilydd i gytuno telerau fel bloc masnachu. Roedd y DU yn arfer bod yn rhan o floc masnachu yr Undeb Ewropeaidd ond nid yw bellach yn rhan o’r bloc yma. Mae wedi gwneud cytundebau gyda nifer o wledydd eraill gan gynnwys Awstralia.

Mae Llywodraeth Cymru hefyd yn marchnata Cymru fel lle ar gyfer busnes ar draws y byd.